ഒരു ചങ്ങാതിയെ വേണം...

ഒരു Companion നെ വേണം .... Companion ൻറെ മലയാളം അർത്ഥം  നോക്കിയപ്പോ കണ്ടതിൽ ഇഷ്ടപ്പെട്ടത് "ചങ്ങാതി " എന്നുള്ള വ്യാഖ്യാനം ആണ് ... ചില വാക്കുകൾക്ക് മലയാളം അർത്ഥം പോരാ എന്ന് തോന്നും .. എത്ര വ്യാഖ്യാനിച്ചാലൂം ഉദ്ദേശിച്ച അർത്ഥം ആകില്ലെന്ന് തോന്നും ... ഇത് അങ്ങനെ ഒരു വാക്കു ആണ് ...  ഉള്ളത് കൊണ്ട് ഓണം എന്നാണല്ലോ .. അപ്പൊ ഈ വാക്ക് തന്നെ ഉപയോഗിക്കാം ന്നു ഉറപ്പിച്ചു .. അപ്പൊ ഞാൻ പറഞ്ഞു വന്നത് ....


എനിക്ക് ഒരു ചങ്ങാതിയെ വേണം...
ആണെന്നോ പെണ്ണെന്നോ വേർതിരിവില്ലാതെ ഒരു ചങ്ങാത്തം
പ്രണയത്തിന്റെ നിറങ്ങൾ ഏൽക്കാത്ത ഒരു ചങ്ങാത്തം ....
  ...
 മണിക്കൂറുകളോളം സംസാരിക്കാൻ ...
വിഷയ ദാരിദ്ര്യമില്ലാതെ സംവദിക്കാൻ ....
 എന്താവശ്യത്തിനും വിളിക്കാൻ .... വിളിച്ചാൽ ഓടി വരാൻ...
തിരിച്ചു എന്നെയും വിളിക്കാൻ ....
കുസൃതികൾ ഒപ്പിക്കാൻ ...
പരദൂഷണം പറയാൻ ...
കൂടെ ചിരിക്കാൻ ....
കരയാൻ തുടങ്ങിയാൽ എന്നെ ശാസിക്കാൻ ... അല്ലെങ്കിൽ എന്തെങ്കിലും വിഡ്ഢിത്തരം പറഞ്ഞു എന്നെ ചിരിപ്പിക്കാൻ ...

ലക്ഷ്യമില്ലാത്ത യാത്രകൾ പോകാൻ ...
പ്രകൃതിയുടെ  നിശബ്ദത ആസ്വദിക്കാൻ ...
ആകാശം നോക്കി നക്ഷത്രങ്ങളെ എണ്ണാൻ ....
കടൽത്തീരത്ത് തിരകളെ നോക്കി ഇരിക്കാൻ ...
മഴ ആസ്വദിക്കാൻ ..... (with പഴംപൊരി &കട്ടൻ ചായ )
മറ്റാർക്കും മനസ്സിലാകാത്ത തമാശകൾ പറഞ്ഞു ചിരിക്കാൻ ...
 പാതിരാത്രിക്ക് ഐസ്ക്രീം കഴിക്കാൻ ...

പ്രേത സിനിമകൾ കാണുമ്പോ കണ്ണ് പൊത്തി ഒരുമിച്ചു പേടിക്കാൻ ..
senti സീനുകൾ വരുമ്പോ  കൂടെ കരയാൻ ..(അല്ലെങ്കിൽ അതും പറഞ്ഞു കളിയാക്കാൻ )..
കോമഡി കണ്ടു ചിരിച്ചു ചിരിച്ചു കണ്ണിൽ നിന്നും വെള്ളം വരാൻ....

നാളെ തൊട്ടു നന്നാവാം എന്ന് തീരുമാനം എടുക്കാൻ ...
ഏറ്റവും വിഡ്ഢിത്തം എന്ന് തോന്നുന്ന ആഗ്രഹങ്ങൾ പറയാൻ ..
ഒരുമിച്ചു വായിനോക്കാൻ ...
Window seat കിട്ടാൻ വേണ്ടി അടികൂടാൻ ....
long drive നു പോകാൻ ...
ഒരു ട്യൂൺ ഉം ഇല്ലാതെ പാട്ടുകൾ പാടാൻ ...
എല്ലാ പാട്ടുകൾക്കും ഒപ്പം ഡാൻസ് ചെയ്യാൻ ....
ദിവസം രണ്ടു മൂന്നു സിനിമക്ക് പോകാൻ ....
സമയകാല ബോധം ഇല്ലാതെ കറങ്ങാൻ ..
കിലോമീറ്ററുകൾ താണ്ടി ഭക്ഷണം കഴിക്കാൻ ...
ഭക്ഷണം നല്ലതല്ലെങ്കിൽ അവരുമായി അടി ഉണ്ടാക്കാൻ ...
ചോക്ലേറ്റ് വാങ്ങി തരാൻ ....

രണ്ടു പെഗ് അടിച്ചു പൂർവ കാമുകന്മാരെ കുറ്റം പറയാൻ ...
നഷ്ടപ്രണയം പറഞ്ഞു തോളിൽ ചാഞ്ഞു കരയാൻ ...

new year resolutions ഒരുമിച്ചു എടുക്കാൻ ...
അത് ദിവസങ്ങൾക്കുള്ളിൽ ഒരുമിച്ചു break ചെയ്യാൻ ...


മാസം അവസാനം ആകുമ്പോ ഒരുമിച്ചു പൈസ ഇല്ലാതെ തെണ്ടാൻ ...
അടുത്ത മാസം തൊട്ടു ചിലവ് ചുരുക്കും ന്നു വാക്കു കൊടുക്കാൻ ...
കടം വാങ്ങാൻ ... തിരിച്ചു ചോദിച്ചാൽ പറ്റിലെഴുതിക്കൊന്നു പറയാൻ ....
ഒന്നും ചെയ്യാതെ വെറുതെ ഇരുന്നു മടി പിടിക്കാൻ ....
പറയാതെ എല്ലാം മനസ്സിലാക്കാൻ ..
എന്റെ തെറ്റുകൾ മുഖത്ത് നോക്കി പറയാൻ ....

എന്നെ ഞാനായി കാണാൻ..
എന്നെ മാറ്റാൻ  ശ്രമിക്കാതെ സ്വീകരിക്കാൻ ...

പ്രശ്ങ്ങൾക്കു മുന്നിൽ പതറുമ്പോ ...പേടിക്കേണ്ടെടി .. ഞാനില്ലേ കൂടെ ന്നു പറയാൻ ....

എനിക്കൊരു ചങ്ങാതിയെ വേണം....

P .S : ഈ സേവനങ്ങൾ ഒക്കെ തിരികെയും ഉണ്ട് ട്ടോ ...!!!!

ചോതി നാളും കടലമ്മയും

എൻറെ ജന്മ നക്ഷത്രം ചോതി ആണ് .... പിതാവിനും ചുറ്റുമുള്ളവർക്കും ഒക്കെ വളരെ നല്ല നക്ഷത്രം ആണെന്നാണ് കേട്ടറിവ്  (എനിക്ക് പ്രത്യേകിച്ച് ഉപകാരം ഒന്നുമില്ലെന്നും വേണമെങ്കിൽ പറയാം ).
പറഞ്ഞു വന്നത് എന്താണ് വെച്ചാൽ .. ചെറുപ്പം തൊട്ടേ വെള്ളത്തിനോട് പ്രത്യേക അഭിനിവേശം ആയിരുന്നു ... കുളം , പുഴ ഇതൊക്കെ കാണാൻ വല്യ സന്തോഷം ആയിരുന്നു ... ഏതു ബന്ധുവീട്ടിൽ പോയാലും ആദ്യം നോക്കുന്നത് കുളം ഉണ്ടോന്നാണ് ...  ആ എനിക്ക് കടലിനോടു ഒരു സ്നേഹം തോന്നിയതിൽ അത്ഭുതം ഇല്ല ...

എന്റെ വീട് കടലിന്റെ അടുത്തൊന്നും അല്ല... എന്നാൽ പോകാൻ പറ്റാത്ത അത്ര ദൂരെയും അല്ല കടൽ .... എന്നിട്ടും ഞാൻ ആദ്യമായി കടൽ കാണുന്നത് ഏഴാം ക്ലാസ്സിൽ പഠിക്കുമ്പോഴാണ് ...  അമ്മ എന്നെ വിട്ടിരുന്നില്ല  അത് വരെ ..  കൂട്ടുകാരോട് പറഞ്ഞാൽ അവര് പറയും ചോതി കടലമ്മയുടെ നാള് ആണ് ... ചോതി നാളുകാര് കടലിന്റെ അടുത്തേക്ക് പോയാൽ കടലമ്മ കൊണ്ട് പോകും എന്നൊക്കെ ... പിന്നെ ചിലർ പറഞ്ഞു കടലമ്മയുടെ മകളുടെ നാളാണ് ചോതി എന്ന് .. എന്തായാലും റിസൾട്ട് ഒന്ന് തന്നെ ... എന്നെ കടലമ്മ കൊണ്ടുപോകും ...

ഇതൊക്കെ കേട്ട ഞാൻ അപ്പൊ തന്നെ അമ്മയോട് അന്വേഷിച്ചു .. അമ്മയും സമ്മതിച്ചു ... ചോതി നാളുകാർ കടല് കാണാൻ പോകില്ലെന്ന് .... സത്യത്തിൽ എന്റെ വെള്ളത്തിനോടുള്ള ഇഷ്ടം കാരണം 'അമ്മ പേടിച്ചിട്ടാകും എന്നെ കൊണ്ടുപോകഞ്ഞേ .... ഞാൻ കടലിൽ പോയി വെള്ളത്തിൽ കളിച്ചു വല്ല അപകടവും വരുമൊന്നു പേടിച്ചിട്ടാകും എന്നെ വിടാഞ്ഞേ ...

എന്തായാലും ആ കഥ കുറെ കാലം മനസ്സിൽ ഉണ്ടായിരുന്നു .. പിന്നെ പന്ത്രണ്ടാം ക്ലാസ്സിൽ ശെരിക്കു കടൽ കാണുന്ന വരെ ...

ഇപ്പൊ പേടിയൊന്നുമില്ല ... സത്യം പറഞ്ഞാൽ കടലിന്റെ അടുത്ത് പോകുമ്പോ ഒരു സമാധാനം ആണ് .... മനസ്സിലെ ടെൻഷൻ ഒക്കെ മാറും .. കടലിനു അങ്ങനെ ഒരു ശക്തി ഉണ്ടെന്നു സയൻസ് വരെ പറഞ്ഞിട്ടുണ്ട് ..

എന്തൊക്കെ ആണേലും കടല് ആയി ഒരു പ്രത്യേക കണക്ഷൻ എനിക്കുണ്ട് ... സങ്കടം വരുമ്പോ അവിടെപ്പോയി ഇരിക്കാൻ തോന്നാറുണ്ട് ....

ഇനി ആ കഥയിൽ പറയുന്ന പോലെ വല്ല കണക്ഷൻ ഉം ഉണ്ടോ ഞാനും കടലും തമ്മിൽ..... !!!!

കത്ത്‌

കത്ത് ...  ഒരുപാട് കിട്ടണം ന്നു ആഗ്രഹിച്ചിട്ടുണ്ട് .... കയ്യിൽ കൊടുക്കുന്ന ലവ് ലെറ്റർ അല്ല ട്ടോ .... എഴുതി സ്റ്റാമ്പ് ഒട്ടിച്ചു നമ്മളെ തപ്പി വീട്ടിൽ എത്തുന്ന കത്ത് ... എന്നാണ് അവസാനം ആയി കത്ത് എഴുതിയത്.... !!!! കുറെ കാലം മുന്നേ ... ഫോൺ നും ഇന്റർനെറ്റ് ഇനും മുന്നേ....!!!

അച്ഛൻ കുവൈറ്റ് ഇൽ ആയിരുന്നപ്പോ എഴുതിയിരുന്നു ... ഫോൺ വന്നപ്പോ അതും നിന്നു ... ഗ്രീറ്റിംഗ് കാർഡ് പിന്നേം കുറെ കാലം ഉണ്ടായിരുന്നു ... ഇപ്പൊ അതിനും വംശ നാശം വന്നു ... എന്നാലും അത്രേം അടുപ്പം ഉള്ളവർക്ക് ഇപ്പോഴും ഞാൻ കാർഡ് അയക്കാൻ ശ്രമിക്കാറുണ്ട് ട്ടോ ... (കാർഡ് കണ്ടുപിടിക്കാൻ ബുദ്ധിമുട്ട് ആണെങ്കിൽ കൂടി ) ...

കഴിഞ്ഞ തവണ നാട്ടിൽ പോയപ്പോ വീട്ടിലെ അലമാരയിൽ പഴയ ഗ്രീറ്റിങ് കാർഡുകൾ .... കുറെ ഉണ്ട് ട്ടോ ....  അടുത്ത കാലത്തു കിട്ടിയതൊന്നുമല്ല ... കോളേജിലും സ്കൂളിലും ഒക്കെ ഉള്ളപ്പോ കിട്ടിയതാ .. കൂടെ എന്റെ ഒന്ന് രണ്ടു ഓട്ടോഗ്രാഫും ... കുറെ നേരം വായിച്ചു നോക്കി .... എന്തൊക്കെയാ എഴുതിവെച്ചേക്കണേ ന്നു ഓർത്തു കുറെ ചിരിച്ചു .....
പക്ഷെ പിന്നെ ആലോചിച്ചപ്പോഴാ അതിന്റെ വില മനസ്സിലാകുന്നേ ..  സ്വന്തം കൈപ്പടയിൽ എഴുതി ഒരാൾക്ക് ഒരു കാർഡ് അല്ലെങ്കിൽ കത്ത്‌ എഴുതുമ്പോ അത് എത്ര സ്പെഷ്യൽ ആയിരുന്നു ന്നു ... ഇന്ന് എത്ര പേര് ചെയ്യാറുണ്ട് അങ്ങനെ ...
സത്യം പറഞ്ഞാൽ ഞാൻ കൊതിക്കാറുണ്ട് ഒരു കത്ത് കിട്ടാൻ ... അവസാനം കത്ത് കിട്ടിയത് ഹോസ്റ്റലിൽ ഉള്ളപ്പോ എന്നെ പഠിപ്പിച്ച ടീച്ചർ അയച്ചതാണ് ന്നു  തോന്നുന്നു ...

ഒന്ന് ആലോചിച്ചേ ... ഇപ്പൊ ഒരു കത്ത് നിങ്ങൾ ആർക്കെങ്കിലും എഴുതിയാൽ എന്തായിരിക്കും അത് വായിക്കുന്ന ആളുടെ മനസ്സിൽ ..."ഇവൾക്കെന്താ വട്ടായോ? " ഇതാകും ആദ്യത്തെ സംശയം .. പക്ഷെ പിന്നെ അത് ഒരു രസം ആയിമാറും .... സ്നേഹത്തോടെ മനസ്സിൽ ഉള്ളതൊക്കെ കത്തിൽ എഴുതാന് പറഞ്ഞാൽ കുറച്ചു  പാടാ ... പക്ഷെ അങ്ങനെ എഴുതിയ ഒരു കത്ത് വേണം ന്നു ഒരിക്കലെങ്കിലും ആഗ്രഹിച്ചിട്ടില്ലേ ?.... പഴയ പുസ്തകങ്ങളുടെ ഇടയിൽ ഒളിച്ചിരിക്കുന്ന ഒരു കത്ത്‌ .... അല്ലെങ്കിൽ ഒളിപ്പിക്കാൻ ഒരു കത്ത് ....

കൈകൊണ്ടു എഴുതിയ കത്തിൽ നിന്നും കിട്ടുന്ന എന്ത് intimacy ആണ് ഇന്നത്തെ മെസ്സേജ് ഇലും ഇമെയിൽ യിലും കിട്ടാ ...

ഞാൻ എന്തായാലും തീരുമാനിച്ചിട്ടുണ്ട് .... എന്നെങ്കിലും ആ ആള് എന്റെ ജീവിതത്തിൽ വരുമ്പോ ഞാൻ ആദ്യം ചോദിക്കാ "എനിക്ക് ഒരു കത്ത് എഴുതി തരോ " ന്നു ആയിരിക്കും .... എനിക്കും വേണം ഒരു പ്രണയലേഖനം ..... വല്ലപ്പോഴും എടുത്തു വായിച്ചു ഒരു നെടുവീർപ്പിട്ടു വീണ്ടും എടുത്തു വെക്കാൻ വേണ്ടി ഒരു കത്ത് .... എഴുതിയ ആളുടെ ശബ്ദം കാതിൽ കേൾക്കാൻ വേണ്ടി .... വീണ്ടും വീണ്ടും എടുത്തു വായിക്കാൻ ഒരു കത്ത് ......!!!!

അപ്പൊ എഴുതല്ലേ .. ഒരു കത്ത്‌ ...
ആർക്കെങ്കിലും ... ഒരു പഴയ സുഹൃത്ത് ന്നു ആകാം ... പൂർവ കാമുകൻ അല്ലെങ്കിൽ കാമുകിക്ക് ആകാം .... പഴയ ടീച്ചർ നു ആകാം ...
ഒന്ന് ശ്രമിച്ചു നോക്കിയാലോ  ....!!!!
 

പ്രണയത്തിന്റെ നിറം...

അന്ന് പതിവില്ലാതെ ഓട്ടോയിൽ കയറിയപ്പോ ഒരു ബഹളം ... സംഭവം എന്താണ് നോക്കിയപ്പോ ആണ് മനസ്സിലായെ ... കൂട്ടത്തിലെ ചേച്ചിയുടെ കയ്യിൽ ഒരു കടലാസ്സ് കഷ്ണം ... അതിനെ ചുറ്റിപറ്റി ആണ് ബഹളം ... ഏതോ പത്രത്തിന്റെ കഷ്ണം ആണ് ...  ഏന്തി വലിഞ്ഞു നോക്കുമ്പോഴേക്കും എന്റെ നേരെ ഒരു ചോദ്യം ...എന്താ നിന്റെ ഇഷ്ടപെട്ട കളർ ന്നു ... അന്ന് ഞാൻ എന്താ പറഞ്ഞെന്നു ഓർമ ഇല്ല ... നീല ആണെന്ന് തോന്നുന്നു .... ഓരോരുത്തരോടും ചോദിച്ചു വരുമ്പോഴേക്കും സ്കൂൾ എത്തി ... അത് അവിടെ തീർന്നു ...
                 വൈകിട്ട് വണ്ടി വരാൻ കത്ത് നിൽക്കുന്ന നേരത്തു ആ കടലാസ്സ് വീണ്ടും പുറംലോകം കണ്ടു ... അപ്പോഴാണ് കാര്യം മനസ്സിലായെ ... അതിൽ ഓരോ നിറങ്ങളും ഇഷ്ടപ്പെടുന്നവരുടെ സ്വഭാവം എഴുതിയിട്ടുണ്ടത്രെ ... പിന്നെ അത് അറിയാനായി ബഹളം ... ബഹളത്തിനിടക്ക് നിഷ്കളങ്കതയോടെ അവൾ ചോദിച്ചു .... അവൻ ഏതു നിറം ആണ് പറഞ്ഞെന്നു ... ആ ധൃതിയിൽ അവൻ പറഞ്ഞ നിറം "വെള്ള" എന്ന് ആരോ പറഞ്ഞു .... പിന്നെ അവിടെ ചിരിയായി ... നോക്കിയപ്പോ വെള്ളനിറം ഇഷ്ടമുള്ളവർ മാനസിക വിഭ്രാന്തി ഉള്ളവർ ആണത്രേ .. അത് വായിച്ചാണ് ചിരി .... അവളും കൂട്ടത്തിൽ ചേർന്നു ... ഒന്നുമില്ലെങ്കിലും ആ പേര് പറഞ്ഞു അവനെ കളിയാക്കലോ .. എന്തായാലും അവൻ അടികൂടും ... അങ്ങനെ അവനോടു സംസാരിക്കാല്ലോ ...

    അപ്പോഴും അവളുടെ മനസ്സിൽ കുറെ ചോദ്യം ആയിരുന്നു .. 5 ആം ക്ലാസ്സ്‌കാരിയുടെ കൗതുകങ്ങൾ .... വെള്ള അവളുടെ കണ്ണിൽ ഒരു കളർ അല്ല ... ആരെങ്കിലും വെള്ള ഒക്കെ ഇഷ്ടപ്പെടോ .. ഇതായിരുന്നു അവളുടെ സംശയം ...
അന്ന് മനസ്സിൽ കുറിച്ച് വെച്ചു  ... അവനു ഇഷ്ടം വെള്ള നിറം ആണ് ...!!!!

14 വർഷങ്ങൾക്കു ശേഷം വീണ്ടും കണ്ടപ്പോ അവൾ അവനോടു ചോദിച്ചു ..ഇപ്പോഴും വെള്ള നിറം ആണോ ഇഷ്ടം  ന്നു ... അത്ഭുതത്തോടെ അവൻ അവളെ നോക്കി ... നിനക്കെങ്ങനെ അറിയാം എന്നായിരുന്നു ആ കണ്ണിൽ ... അന്ന് ആ കടലാസിന്റെ കഥ പറഞ്ഞു അവർ കുറെ ചിരിച്ചു ...

ഇന്നും വെള്ള നിറം അവൾക്കു സ്പെഷ്യൽ ആണ് ... അവൻറെ കളർ അല്ലെ ...
തൂവെള്ള നിറം കാണുമ്പോ അവനെ ഓർക്കും .... അവന്റെ നിറം അല്ലെന്നു ഓർക്കും ...!!! വെള്ള നിറമുള്ള ഡ്രസ്സ് എടുക്കുമ്പോ അവനെ ഓർക്കും .. !!! വെള്ളപ്പൂക്കൾ കാണുമ്പോ അവനെ ഓർക്കും ..!!!

എല്ലാവര്ക്കും വെള്ള സമാധാനത്തിൻറെ നിറം ആണ് ... അവൾക്കു മാത്രം പ്രണയത്തിന്റെ നിറം ... !!! അവളുടെ പ്രണയത്തിന്റെ നിറം...!!!

വനിതാ ദിന സ്പെഷ്യൽ

ഇന്ന് വനിതാദിനം ....
പെണ്ണുങ്ങൾ ഉണ്ടെന്നു ലോകം ഓർക്കുന്ന ദിവസം .. ബാക്കി ദിവസങ്ങളിൽ ഓർക്കില്ലെന്നല്ല .. എല്ലാ ദിവസവും ഓർക്കും ... ഇപ്പൊ റേപ്പ് ഉം പീഡനവും ഇല്ലാത്ത ദിവസങ്ങൾ ഇല്ലല്ലോ ... പല പല ലേഖനങ്ങളിൽ സ്ത്രീ മാഹാത്മ്യവും കാണാം .....   ഇത്രേം ഉണ്ടായിട്ടും പെണ്ണുങ്ങളെ എന്നും ഓർത്തില്ലെങ്കിൽ മോശമല്ലേ !!!!
അപ്പൊ കാര്യത്തിലേക്കു കടക്കാം !!!
നായർ തറവാട്ടിൽ പൊതുവെ സ്ത്രീകൾക്കാണ് ചുമതല എന്ന തെറ്റിദ്ധാരണ കുറെ കേട്ടിട്ടുണ്ട് ... അങ്ങനെ ഒരു തറവാട്ടിൽ വളർന്നത്തിന്റെ അറിവാണെന്നു കൂട്ടിക്കോളൂ .. അങ്ങനെ ഇല്ല .... ഞാനും ഈ അവഗണന കുറെ കണ്ടു വളർന്നതാണ് .. ഇപ്പോഴും കാണുന്നുമുണ്ട് .. എന്നാൽ ആവുന്ന വിധം അതിനെ എതിർത്തിട്ടുമുണ്ട് ..... വിജയിക്കില്ലെന്നറിഞ്ഞു കൊണ്ടും

ഏതൊരു പെണ്കുട്ടിയെപ്പോലെയും ആണുങ്ങളുടെ അടുത്ത് നിന്ന് പലപ്പോഴായി commnets കേട്ടിട്ടുണ്ട് .. അശ്‌ളീല ചുവയുള്ള comments തന്നെ .. പലതും കേട്ടില്ലെന്നു നടിച്ചു ...!!! തോണ്ടലും പിച്ചലും എണ്ണിയാൽ തീരാത്തവ ... ബസ്, തീയറ്റർ , എന്ന് വേണ്ട എല്ലാ ഇടങ്ങളിലും അദൃശ്യമായ കരങ്ങൾ എന്റെ ശരീരം തേടി വന്നിരുന്നു ... തൃശ്ശൂർകാരി ആയിട്ട് ഞാൻ ഇത് തൃശൂർ പൂരം കണ്ടിട്ടില്ല ... ചെറുതായിരുന്നപ്പോ കൊണ്ടുവാൻ ആളുണ്ടായിരുന്നില്ല  ... പിന്നെ എട്ടാം ക്ലാസ്സിൽ പഠിക്കുമ്പോ സാമ്പിൾ വെടിക്കെട്ടു കാണാൻ പോയി ... ചെറിയച്ഛൻറെ കൂടെ ... അന്ന് ആണ് 'അമ്മ എന്താണ് ഒറ്റയ്ക്ക് വിടാത്തതെന്നു മനസ്സിലായെ .... നിന്ന നിൽപ്പിൽ ഉരുകിയിരുന്നെകിൽ ന്നു ആഗ്രഹിച്ച നിമിഷം .... !!! ബിയർ ന്റേം വിയർപ്പിന്റേം നാറ്റത്തോടെ വന്ന കയ്യുകൾ !!!! പിന്നെ ഒരിക്കലും പൂരം കാണാൻ പോയിട്ടില്ല ... പോകാൻ പല അവസരങ്ങൾ ഉണ്ടായിട്ടും ....!!!!

ഇങ്ങനെ ഒരു അനുഭവം ഇല്ലാത്ത പെൺകുട്ടികൾ ഒരു പക്ഷെ വീട്ടിൽ നിന്ന് തന്നെ പുറത്തേക്കു ഇറങ്ങിയിട്ടുണ്ടാകില്ല ...!!!
ഇതിനൊക്കെ പുറമെ വീട്ടിൽ ഉള്ള വിവേചനം വേറെയും .... "അവനു പോകാൻ പറ്റുംച്ചാൽ ഞാൻ പോയാൽ എന്താ കുഴപ്പം ??? " , " അവനു ചെയ്യാൻ പറ്റുംച്ചാൽ എനിക്കും ചെയ്യണം " etc  etc ... ഈ ഡയലോഗ് കേൾക്കാത്ത വീടുകൾ വിരളം !!! ഞാനും വ്യത്യസ്തയല്ല  !!!
അനിയന് കിട്ടുന്ന ആനുകൂല്യങ്ങൾ കണ്ടു പലപ്പോഴും അടി കൂടിയിട്ടുണ്ട് ...
അത് അച്ഛനമ്മമാരുടെ സ്നേഹക്കുറവ് കൊണ്ടാണെന്നു ഞാൻ പറയില്ല ... അവര് നമ്മളെ സംരക്ഷിക്കാൻ ശ്രമിക്കുന്നതാണ് ... അവര് അവരുടെ രീതിയിൽ ശെരിയാണ് ... പക്ഷെ ഇത് കാണുന്ന പെൺകുട്ടികളോ ...
സത്യത്തിൽ ചെറുപ്പം തൊട്ടേ ഓരോ പെൺകുട്ടിയും ചിന്തിക്കല്ലേ ആൺകുട്ടിയായി ജനിച്ചാൽ മതിയായിരുന്നു ന്നു ... കൂടുതൽ offers ആ ജന്മത്തിൽ അല്ലെ ....!!!ആ നിമിഷം ഒരു ഫെമിനിസ്റ്റ് ജനിച്ചു !!!!

ആരും feminist ആയി ജനിക്കുന്നില്ല .... സാഹചര്യങ്ങൾ അങ്ങനെ ചിന്തിപ്പിക്കുന്നതാണ് !!!
എല്ലാ പെണ്കുട്ടികളിലും ഒരു ഫെമിനിസ്റ്റ് ഉണ്ട് ... പലരും ഉണർത്താതെ ഉറക്കിക്കൊണ്ടിരിക്കുന്ന തങ്ങളുടെ തന്നെ വേറെ ഒരു രൂപം !!!

ഇങ്ങനെ അനുഭവങ്ങൾ ഇല്ലാത്തവർ ഭാഗ്യവതികൾ !!!!

 ഇങ്ങനെ ഒരു തോന്നലില്ലാതെ എന്ന് ഒരു പെൺകുട്ടി ഈ നാട്ടിൽ വളരുന്നുവോ .. അന്ന് നമ്മുടെ നാട് പുരോഗമിക്കും !!! അന്ന് ഇത് ദൈവത്തിന്റെ സ്വന്തം നാട് ആകും ... എല്ലാ അർത്ഥത്തിലും !!!

തിരുത്താൻ പറ്റാത്ത നിമിഷങ്ങൾ

  എല്ലാവരുടെ ജീവിതത്തിലും ഉണ്ടാകും വല്യേട്ടനെ പോലെ ഒരു ആൾ ..

  അവളുടെ ലൈഫ് ലും ഉണ്ട് ഒരു ഏട്ടൻ ... നമുക്ക് ആളെ സിജോചേട്ടൻ ന്നു വിളിക്കാം .... 

  അന്ന് വേറെ ആരെയും വിളിക്കാൻ ധൈര്യം ഇല്ലാതെ അവൾ സിജോചേട്ടനെ വിളിച്ചു ... മടിച്ചു മടിച്ചു കാര്യം പറഞ്ഞു ... കണ്ണിലേക്കു നോക്കാൻ വരെ പേടിയായിരുന്നു ...  എല്ലാം മനസ്സിലായ പോലെ ചേട്ടന്റെ മുഖം ... ഒരു നെടുവീർപ്പോടെ പറഞ്ഞു ...

 നമുക്ക് പോലീസ് ഇൽ പരാതി കൊടുക്കാം ... അല്ലാതെ ഇങ്ങനെയുള്ളവരെ വെറുതെ വിട്ടാൽ പറ്റില്ല ... എൻറെ സുഹൃത്തിന്റെ classmate ബാംഗ്ലൂർ പോലീസ് കമ്മിഷണർ ആണ് ... നമുക്ക് ആളെ പോയി കാണാം ...
ഞാനും  എല്ലാറ്റിനും സമ്മതം മൂളി ...

അങ്ങനെ നിശ്ചിത ദിവസം വന്നെത്തി ... ഓഫീസിൽ നിന്നും ഒരു break എടുത്തു ഞാൻ കമ്മീഷണർ ഓഫീസിൽ എത്തി .... പുറകെ ചേട്ടനും എത്തി ....

അവളുടെ നെഞ്ചിടിപ്പ് അവൾക്കു തന്നെ കേൾക്കാമായിരുന്നു .... ആദ്യമായിട്ടാ ഇങ്ങനെ പോലീസ് സ്റ്റേഷനിൽ ... ആകെ പേടിയായി ....
എന്ത് ചെയ്തിട്ടാ ഇങ്ങനെ ഇവിടെ എത്തിയെ .... അവൻ ഇങ്ങനെ ചെയ്യുമെന്ന് ഒരിക്കലും കരുതിയില്ല ... അത്രേം അവനെ വിശ്വസിച്ചിരുന്നു ... അവളെക്കാൾ അധികം ... ആ ധൈര്യത്തിലാണ് അന്ന് ഫോട്ടോ ചോദിച്ചപ്പോ അയച്ചു കൊടുത്തതും .... എല്ലാവരും അവനെപ്പറ്റി പറഞ്ഞിട്ടും അവൾക്കു വിശ്വാസം ആയില്ലായിരുന്നു ... സ്നേഹം അന്ധമാണെന്ന് പറയുന്നത് വെറുതെ അല്ലാന്നു അവൾ ഇപ്പൊ തിരിച്ചറിയുന്നു...
അവനു വഴങ്ങാതെ ആയപ്പോ അത് publish ചെയ്യുമെന്ന് പറഞ്ഞായിരുന്നു ഭീഷണി .. അല്ലെങ്കിൽ parents നു അയക്കും ന്നു ...  ഒന്നും അറിയാതെ അച്ഛനും അമ്മയും ആ ഫോട്ടോ കാണുന്നത് ഓർത്തു തന്നെ അവൾ വിറച്ചു ... ഇല്ല .. അത് പാടില്ല .... അങ്ങനെ ആണ് അവൾ സിജൊച്ചേട്ടനെ വിളിക്കുന്നത് ...

ഇപ്പൊ ഇവിടെ ആ സ്റ്റേഷനിൽ ഇരിക്കുമ്പോ ... ഇതാണോ ശെരി ന്നു അവൾ ആലോചിച്ചു ...

അങ്ങനെ  കുറെ കാത്തിരിപ്പിന് ശേഷം അവർക്കു ഓഫീസറിനെ കാണാൻ പറ്റി .. സിജൊച്ചേട്ടൻ കാര്യങ്ങൾ ഒക്കെ കന്നഡ ഇൽ പറഞ്ഞു മനസ്സിലാക്കി .... അപ്പൊ കമ്മിഷണർ അവളോട് ഒറ്റയ്ക്ക് സംസാരിക്കണം ന്നു പറഞ്ഞു .. ' സിജൊച്ചേട്ടൻ പുറത്തു ഇറങ്ങിയപ്പോ ആ ഓഫീസർ അവളോട് ചോദിച്ചു ..  നമുക്ക് കേസ് എടുക്കാം .. പക്ഷെ അവൻ എന്തായാലും ജയിലിൽ പോകും ....  അവനു ഫാമിലി ഒക്കെ ഉള്ളതല്ലേ ... ഇനി ആ ദേഷ്യത്തിൽ അവൻ ഫോട്ടോ ആർക്കെങ്കിലും അയച്ചല്ലോ .... അപ്പോഴും നഷ്ടപ്പെടാൻ നമുക്കല്ലേ ഉള്ളൂ ...
അതല്ലെങ്കിൽ പിന്നെ നമുക്ക് wait ചെയ്യാം ... ഇനി എന്തെങ്കിലും ശല്യം ഉണ്ടായാൽ അപ്പൊ നോക്കാം .. എല്ലാം നിങ്ങളുടെ തീരുമാനം പോലെ ...
 ഇത്രയും പറഞ്ഞു ഓഫീസർ അവളെ നോക്കി ...

വേറെ എന്താ പറയാ ... ആലോചിച്ചപ്പോ അതല്ലേ നല്ലതു ന്നു അവൾക്കും തോന്നി .... അവളും പറഞ്ഞു നമുക്ക് wait ചെയ്യാം സർ ന്നു ....

സിജൊച്ചേട്ടൻ പിന്നെ വരുമ്പോഴേക്കും ഇത് തീരുമാനം ആയിരുന്നു ... അവളെ പിന്തിരിപ്പിക്കാൻ കുറെ നോക്കിയെങ്കിലും  അവൾ മാറിയില്ല ... സിജൊച്ചേട്ടന്റെ അഭിപ്രായത്തിൽ ഇങ്ങനെ ചെയ്യുന്നവരൊക്കെ ജയിലിൽ പോകേണ്ടവർ ആണ് ...  വേറെ ആരെങ്കിലും ആണെങ്കിൽ അവൾ ഒരു പക്ഷെ അത് ചെയ്തേനെ ... ഇത് ഇപ്പൊ അവൻ അല്ലെ ... സാരല്യ .. എന്നെ ഒന്ന് പേടിപ്പിക്കാൻ  ആകും ചെയ്തെന്നു പറഞ്ഞു അവൾ കുറെ ആശ്വസിപ്പിക്കാൻ ശ്രമിച്ചു ......

ദിവസങ്ങൾ പിന്നേം കടന്നു പോയി .... അവൾ ഇതൊക്കെ മറന്നു ദൈനംദിന ജീവിതത്തിൽ മുഴുകി മുന്നോട്ടു പോയി ...
 ആ മെസ്സേജ് കിട്ടും വരെ ..

" നീ എന്റെ റൂമിലേക്ക്‌ വായോ ... ഇവിടെ ഇപ്പൊ ആരും ഇല്ല .... പേടിക്കണ്ട ഞാൻ വീഡിയോ ഒന്നും എടുക്കില്ല ... ഒന്ന് അടിച്ചു പൊളിച്ചു പോകാം ന്നെ ... "

അന്ന് അവൾ  അറിഞ്ഞു ... അവന്റെ ഉള്ളിലെ യഥാർത്ഥ ചെകുത്താനെ ...
പ്രേമം കൊണ്ട് അടഞ്ഞ കണ്ണുകൾ അന്ന് സത്യത്തിന്റെ മുന്നിൽ തുറന്നു .....

ഒരു പക്ഷെ ഇനി ഒരിക്കലും ഒരാളെയും വിശ്വസിക്കാൻ പറ്റാത്ത വിധത്തിൽ അവൾ മാറിക്കഴിഞ്ഞു ....!!!

നെടുവീർപ്പോടെ അവൾ ഓർത്തു ... അന്ന് ആ കേസ് എടുത്തിരുന്നെങ്കിൽ  ????? ഒരു പക്ഷെ എന്നെന്നേക്കുമായി ആ അദ്ധ്യായം അവസാനിച്ചേനെ ...
 ഇത് ഒരു ശാപം ആയി കൂടെ കൂടില്ലായിരുന്നു .... !!!

ജീവിതത്തിലെ ചില തെറ്റുകൾ വലുതായി അവളെ വിഴുങ്ങാൻ വരുന്ന പോലെ തോന്നി .... കണ്ണടച്ചാൽ രക്ഷപ്പെടും ന്നു കരുതി അവൾ കണ്ണുകൾ ഇറുക്കിയടച്ചു .... എന്നിട്ടും ആ ശബ്ദം അവളുടെ ചെവികളിൽ മുഴങ്ങി ..  " നിന്നെ ഒരിക്കലും ഞാൻ സമാധാനത്തോടെ ജീവിക്കാൻ അനുവദിക്കില്ല .. ഒരിക്കലും "!!!!

പ്രണയം .. അറിയാതെ പ്രേമിച്ച കാലം

ആ ചന്ദനക്കുറിക്കാരനെ ഒരു നോക്ക് കാണാൻ വേണ്ടി മാത്രം അമ്പലത്തിൽ പോയിരുന്ന ആ നാളുകൾ ... 10 വയസ്സുകാരിക്ക് എന്ത് പ്രേമം... അവനെ കാണുമ്പോ ഒരു പ്രത്യേക സന്തോഷം ... സിനിമയിൽ നസ്രിയ പറയുന്ന പോലെ മനസ്സിൽ മഞ്ഞു വീഴുന്ന പോലെ ഒരു സുഖം ....
ആ സന്തോഷം പലപ്പോഴും വഴക്കായും  അടികൂടിയും അവൾ പുറത്തെടുത്തു ...

ഇടവഴിയിലൂടെ ഓട്ടോ വരുമ്പോ അവളുടെ കണ്ണുകൾ ആദ്യം അവനെ തപ്പും ... മുന്നിലെ സീറ്റിൽ അവൻ ഉണ്ടോന്നു .... പിന്നെ പതിവുപോലെ അവനെ കണ്ണുരുട്ടി പേടിപ്പിച്ചു അകത്തു കയറി ഇരിക്കും ... ഒളികണ്ണിട്ടു അവനെ നോക്കി എങ്ങനെയോ സ്കൂൾ വരെ എത്തും .... അവന്റെ സ്കൂൾ ആയിരുന്നു ആദ്യം ... അവൻ അവന്റെ അനിയത്തിയേയും കൂട്ടി പോകുന്നത് കുറച്ചു അസൂയയോടെ നോക്കും ...... പിന്നെ വൈകുന്നേരം സ്കൂൾ വിടാനുള്ള കാത്തിരിപ്പു .... സ്ക്കൂളിനും വീടിനും ഇടക്കുള്ള ആ 20 മിനിറ്റ് യാത്ര യിൽ അവൾ അവനെ ഉള്ളു തുറന്നു സ്നേഹിച്ചു ... എന്താണെന്ന് മനസ്സിലാകാഞ്ഞിട്ടു പോലും ...
 ആകസ്മികമായി അടുത്തിരിക്കാൻ ഒരു ചാൻസ് കിട്ടിയാൽ എന്ത് സന്തോഷം ആണെന്നോ ...
ഒരു ദിവസം എങ്ങാനും കണ്ടില്ലെങ്കിൽ എന്തോ ഒരു സങ്കടം ... കൂടെ ഉള്ളവർ അവന്റെ പേരും പറഞ്ഞു കളിയാകുമ്പോ പുറമെ എതിർത്താലും ഉള്ളുകൊണ്ടു സന്തോഷിച്ചിരുന്നു അന്ന് ...
വീട്ടിൽ ആദ്യമായി ഫോൺ കിട്ടിയപ്പോ ആദ്യം അന്വേഷിച്ചു അവന്റെ നമ്പർ
... കയ്യിലെ പോക്കറ്റ് ഡയറി ഇൽ അവന്റെ പേര് എഴുതുമ്പോ ഒരു കള്ളത്തരം .... ഉടനെ അതിന്റെ കൂടെ അവന്റെ അനിയത്തിയുടെ പേര് എഴുതി ... ഇനി തന്റെ മനസ്സിലെ കള്ളത്തരം ആരെങ്കിലും മനസ്സിലാക്കിയാലോ എന്നെ പേടി ആകാം ....
പലപ്പോഴും ഫോൺ എടുത്തു വിളിക്കാനും തുനിഞ്ഞിട്ടുണ്ട് ... എന്തോ ധൈര്യം വന്നില്ല ...
stamp കളക്ഷൻ ഉണ്ടെന്നു അറിഞ്ഞു അച്ഛൻറെ കത്തുകൾ തപ്പി foreign സ്റ്റാമ്പ് കൊണ്ടുപോയിക്കൊടുത്തു ...വേറെ ഗിഫ്റ് കൊടുക്കാൻ അന്ന് നമുക്ക് പോക്കറ്റ് മണി ഒന്നും ഇല്ലായിരുന്നു .... ആ ഗിഫ്റ്റിൽ എല്ലാം പറയാതെ പറഞ്ഞു ....
 മറ്റു പെൺകുട്ടികൾ അവനോടു മിണ്ടുമ്പോ തനിക്കായിരുന്നു ദേഷ്യം ... അത് മിക്കവാറും തർക്കുത്തരം പറഞ്ഞു തീർത്തു ...
ആ പിണക്കത്തിലും എത്ര സ്നേഹം ഒളിച്ചിരുന്നു ....
പിന്നീട് ഒരു പ്രേമത്തിലും ആ പരിശുദ്ധി തോന്നിയിട്ടില്ല അവൾക്കു....

ഒന്നും മനസ്സിലാകാത്ത പ്രായത്തിലെ ആ ഇഷ്ടം ...

ആ നിഷ്കളങ്കമായ കാലം ..
 മൊബൈൽ ഫോണും വാട്ട്സ്ആപ്പ് ഉം ഇല്ലാതിരുന്ന കാലത്തേ പ്രേമം എന്ത് നിഷ്കളങ്കം ആയിരുന്നെന്നോ .. ഇന്നത്തെ കാലത്തേ കുട്ടികൾക്ക് ഇത് വല്ലതും മനസ്സിലാകോ
new generation  പിള്ളേരെ .. നിങ്ങളറിയുന്നുവോ .... നിങ്ങൾ എന്തൊക്കെ നഷ്ടപ്പെടുത്തുന്നു എന്ന് ........!!!!